malaipaTukaTAm

Malaipaṭukaṭām (alias Kūttarāṟṟuppaṭai) (583 lines)

((Originally extracted from master file ^10PATTU.OCP))
((Last updated on 2004 April 15th))

{malai-1} tiru maḻai talaiiya iruḷ niṟam vicumpiṉ
{malai-2} viṇ atir imiḻ icai kaṭuppa paṇ amaittu
{malai-3} tiṇ vār vicitta muḻavoṭu ākuḷi
{malai-4} nuṇ urukku uṟṟa viḷaṅku aṭar pāṇṭil
{malai-5} miṉ irum pīli aṇi taḻai kōṭṭoṭu
{malai-6} kaṇ iṭai viṭutta kaḷiṟṟu uyir tūmpiṉ
{malai-7} iḷi payir imirum kuṟum param tūmpoṭu
{malai-8} viḷippatu kavarum tīm kuḻal tutaii
{malai-9} naṭuvu niṉṟu icaikkum ari kural taṭṭai
{malai-10} kaṭi kavarpu olikkum val vāy ellari
{malai-11} noṭi taru pāṇiya patalai um piṟa um
{malai-12} kār kōḷ palaviṉ kāy tuṇar kaṭuppa
{malai-13} nēr cīr curukki kāya kala paiyir
{malai-14} kaṭu kalittu eḻunta kaṇ akal cilampil
{malai-15} paṭuttu vaittaṉṉa pāṟai maruṅkiṉ
{malai-16} eṭuttu niṟuttaṉṉa iṭṭu arum ciṟu neṟi
{malai-17} toṭutta vāḷiyar tuṇai puṇar kāṉavar
{malai-18} iṭukkaṇ ceyyātu iyaṅkunar iyakkum
{malai-19} aṭukkal mīmicai aruppam pēṇātu
{malai-20} iṭi cura nivappiṉ iyavu koṇṭu oḻuki
{malai-21} toṭi tirivu aṉṉa toṇṭu paṭu tivaviṉ
{malai-22} kaṭippakai aṉaittu um kēḷvi pōkā
{malai-23} kural ōrttu toṭutta cukir puri narampiṉ
{malai-24} aralai tīra urīi varakiṉ
{malai-25} kural vārntaṉṉa nuṇ tuḷai irīi
{malai-26} cilampu aḻai pattal pacaiyoṭu cērtti
{malai-27} ilaṅku tuḷai ceṟiya āṇi muṭukki
{malai-28} putuvatu puṉainta veṇkai yāppu amaittu
{malai-29} putuvatu pōrtta poṉ pōl paccai
{malai-30} vatuvai nāṟum vaṇṭu kamaḻ aimpāl
{malai-31} maṭantai māṇṭa nuṭaṅku eḻil ākattu
{malai-32} aṭaṅku mayir oḻukiya a vāy kaṭuppa
{malai-33} akaṭu cērpu porunti aḷaviṉil tiriyātu
{malai-34} kavaṭu paṭa kavaiiya ceṉṟu vāṅku unti
{malai-35} nuṇaṅku aram nuvaṟiya nuṇ nīr māmai
{malai-36} kaḷam kaṉi aṉṉa kataḻntu kiḷar uruviṉ
{malai-37} vaṇarntu ēntu maruppiṉ vaḷ uyir pēr yāḻ
{malai-38} amai vara paṇṇi aruḷ neṟi tiriyātu
{malai-39} icai peṟu tiruviṉ vēttavai ēṟpa
{malai-40} tuṟai pala muṟṟiya pai tīr pāṇaroṭu
{malai-41} uyarntu ōṅku peru malai ūṟu iṉṟu ēṟaliṉ
{malai-42} matam tapu ñamali nāviṉ aṉṉa
{malai-43} tuḷaṅku iyal melinta kal poru cīṟu aṭi
{malai-44} kaṇam koḷ tōkaiyiṉ katuppu ikuttu acaii
{malai-45} vilaṅku malaittu amarnta cē ari nāṭṭattu
{malai-46} ilaṅku vaḷai viṟaliyar niṉ puṟam cuṟṟa
{malai-47} kayam pukkaṉṉa payam paṭu taṇ niḻal
{malai-48} puṉal kāl kaḻīiya maṇal vār puṟavil
{malai-49} pulampu viṭṭu irunta puṉiṟu il kāṭci
{malai-50} kalam peṟu kaṇṇuḷar okkal talaiva
{malai-51} tū malar tuvaṉṟiya karai poru nivappiṉ
{malai-52} mīmicai nal yāṟu kaṭal paṭarntāaṅku
{malai-53} yām avaṇ niṉṟu um varutum nīyir um
{malai-54} kaṉi poḻi kāṉam kiḷaiyoṭu uṇīiya
{malai-55} tuṉai paṟai nivakkum puḷ iṉam māṉa
{malai-56} puṉai tār polinta vaṇṭu paṭu mārpiṉ
{malai-57} vaṉai puṉai eḻil mulai vāṅku amai tiraḷ tōḷ
{malai-58} malar pōl maḻai kaṇ maṅkaiyar kaṇavaṉ
{malai-59} muṉai pāḻ paṭukkum tuṉ arum tuppiṉ
{malai-60} icai nuval vittiṉ nacai ēr uḻavarkku
{malai-61} putu niṟai vanta puṉal am cāyal
{malai-62} mati māṟu ōrā naṉṟu uṇar cūḻcci
{malai-63} vil navil taṭam kai mēvarum perum pūṇ
{malai-64} naṉṉaṉ cēy naṉṉaṉ paṭarnta koḷkaiyoṭu
{malai-65} uḷḷiṉir cēṟir āyiṉ poḻutu etirnta
{malai-66} puḷḷiṉir maṉṟa eṉ tākkuṟutaliṉ
{malai-67} āṟṟiṉ aḷavu um acaiyum pulam um
{malai-68} vīṟṟu vaḷam curakkum avaṉ nāṭu paṭu valci um
{malai-69} malai um cōlai um mā pukal kāṉam um
{malai-70} tolaiyā nal icai ulakamoṭu niṟpa
{malai-71} palar puṟaṅkaṇṭu avar arum kalam tarīi
{malai-72} pulavōrkku curakkum avaṉ īkai māri um
{malai-73} ikaḻunar piṇikkum āṟṟal um pukaḻunarkku
{malai-74} aracu muḻutu koṭuppiṉum amarā nōkkamoṭu
{malai-75} tū tuḷi poḻinta poyyā vāṉiṉ
{malai-76} vīyātu curakkum avaṉ nāḷ makiḻ irukkai um
{malai-77} nallōr kuḻīiya nā navil avaiyattu
{malai-78} vallār āyiṉum puṟam maṟaittu ceṉṟōrai
{malai-79} colli kāṭṭi cōrvu iṉṟi viḷakki
{malai-80} nallitiṉ iyakkum avaṉ cuṟṟattu oḻukkam um
{malai-81} nīrakam paṉikkum añcuvaru kaṭum tiṟal
{malai-82} pēr icai naviram mēey uṟaiyum
{malai-83} kāri uṇṭi kaṭavuḷatu iyaṟkai um
{malai-84} pāy iruḷ nīṅka pakal ceyyā eḻutarum
{malai-85} ñāyiṟu aṉṉa avaṉ vacai il ciṟappu um
{malai-86} ikantaṉa āyiṉum tevvar tēem
{malai-87} nukam paṭa kaṭantu nūḻilāṭṭi
{malai-88} purai tōl varaippiṉ vēl niḻal pulavōrkku
{malai-89} koṭai kaṭaṉ iṟutta avaṉ tollōr varavu um
{malai-90} irai tērntu ivarum koṭum tāḷ mutalaiyoṭu
{malai-91} tirai paṭa kuḻinta kal akaḻ kiṭaṅkiṉ
{malai-92} varai purai nivappiṉ vāṉ tōy iñci
{malai-93} urai cela veṟutta avaṉ mūtūr mālai um
{malai-94} kēḷ iṉi vēḷai nī muṉṉiya ticai ē
{malai-95} miku vaḷam paḻuniya yāṇar vaippiṉ
{malai-96} pukuvatu vantaṉṟu itu ataṉ paṇpu ē
{malai-97} vāṉam miṉṉu vacivu poḻiya āṉātu
{malai-98} iṭṭa ellām peṭṭāṅku viḷaiya
{malai-99} peyaloṭu vaikiya viyaṉ kaṇ irum puṉattu
{malai-100} akal iru vicumpiṉ āal pōla
{malai-101} vālitiṉ virinta puṉ koṭi mucuṇṭai
{malai-102} nīlattu aṉṉa vitai puṉam maruṅkil
{malai-103} makuḷi pāyātu mali tuḷi taḻāliṉ
{malai-104} akaḷattu aṉṉa niṟai cuṉai puṟaviṉ
{malai-105} kauvai pōkiya karum kāy piṭi ēḻ
{malai-106} ney koḷa oḻukiṉa pal kavar īr eṇ
{malai-107} poy poru kayamuṉi muyaṅku kai kaṭuppa
{malai-108} koy patam uṟṟaṉa kulavu kural ēṉal
{malai-109} viḷai tayir pitirviṉ vī ukku iruvi toṟum
{malai-110} kuḷir purai koṭum kāy koṇṭaṉa avarai
{malai-111} mēti aṉṉa kal piṟaṅku iyaviṉ
{malai-112} vāti kai aṉṉa kavai katir iṟaiñci
{malai-113} irumpu kavarvuṟṟaṉa perum puṉam varaku ē
{malai-114} pāl vārpu keḻīi pal kavar vaḷi pōḻpu
{malai-115} vālitiṉ viḷaintaṉa aivaṉam veṇṇel
{malai-116} vēl īṇṭu toḻuti irivuṟṟeṉṉa
{malai-117} kāl uṟu tuvaippiṉ kaviḻ kaṉaittu iṟaiñci
{malai-118} kuṟai aṟai vārā nivappiṉ aṟai uṟṟu
{malai-119} ālaikku alamarum tīm kaḻai karumpu ē
{malai-120} puyal puṉiṟu pōkiya pū mali puṟaviṉ
{malai-121} aval patam koṇṭaṉa am poti tōrai
{malai-122} toyyātu vittiya tuḷar paṭu tuṭavai
{malai-123} aiyavi amaṉṟa veḷ kāl ceṟuvil
{malai-124} mai eṉa virintaṉa nīḷ naṟu neytal
{malai-125} ceyyā pāvai vaḷarntu kaviṉ muṟṟi
{malai-126} kāyam koṇṭaṉa iñci mā iruntu
{malai-127} vayavu piṭi muḻantāḷ kaṭuppa kuḻi toṟum
{malai-128} viḻumitiṉ vīḻntaṉa koḻum koṭi kavalai
{malai-129} kāḻ maṇṭu eḵkam kaḷiṟṟu mukam pāynteṉa
{malai-130} ūḻ malar oḻi mukai uyar mukam tōya
{malai-131} tuṟukal cuṟṟiya cōlai vāḻai
{malai-132} iṟuku kulai muṟuka paḻutta payam pukku
{malai-133} ūḻ uṟṟu alamarum untūḻ akal aṟai
{malai-134} kālam aṉṟi um maram payaṉ koṭuttaliṉ
{malai-135} kāliṉ utirntaṉa karum kaṉi nāval
{malai-136} māṟu koḷa oḻukiṉa ūṟu nīr uyavai
{malai-137} nūṟoṭu kuḻīiyiṉa kūvai cēṟu ciṟantu
{malai-138} uṇṇunar taṭuttaṉa tēmā puṇ arintu
{malai-139} aralai ukkaṉa neṭum tāḷ āciṉi
{malai-140} viral ūṉṟu paṭu kaṇ ākuḷi kaṭuppa
{malai-141} kuṭiñai iraṭṭum neṭu malai aṭukkattu
{malai-142} kīḻ um mēl um kār vāyttu etiri
{malai-143} curam cel kōṭiyar muḻaviṉ tūṅki
{malai-144} murañcu koṇṭu iṟaiñciṉa alaṅku ciṉai palavu ē
{malai-145} tīyiṉ aṉṉa oḷ ce kāntaḷ
{malai-146} tūval kalitta putu mukai ūṉ cettu
{malai-147} aṟiyātu eṭutta puṉ puṟam cēval
{malai-148} ūuṉ aṉmaiyiṉ uṇṇātu ukutteṉa
{malai-149} neruppiṉ aṉṉa pal itaḻ tāay
{malai-150} veṟikkaḷam kaṭukkum viyal aṟai tōṟum
{malai-151} maṇam il kamaḻum mā malai cāral
{malai-152} tēṉiṉar kiḻaṅkiṉar ūṉ ār vaṭṭiyar
{malai-153} ciṟu kaṇ paṉṟi paḻutuḷi pōkki
{malai-154} porutu tolai yāṉai kōṭu cīr āka
{malai-155} tūvoṭu malinta kāya kāṉavar
{malai-156} ceḻum pal yāṇar ciṟu kuṭi paṭiṉ ē
{malai-157} irum pēr okkaloṭu patam mika peṟukuvir
{malai-158} aṉṟu avaṇ acaii al cērntu alki
{malai-159} kaṉṟu eri oḷ iṇar kaṭumpoṭu malaintu
{malai-160} cēnta ceyalai ceppam pōki
{malai-161} alaṅku kaḻai naralum āri paṭukar
{malai-162} cilampu aṭaintirunta pākkam eyti
{malai-163} nōṉā ceruviṉ valam paṭu nōṉ tāḷ
{malai-164} māṉa viṟal vēḷ vayiriyam eṉiṉ ē
{malai-165} num il pōla nillātu pukku
{malai-166} kiḻavir pōla kēḷātu keḻīi
{malai-167} cēṇ pulampu akala iṉiya kūṟi
{malai-168} parūu kuṟai poḻinta ney kaṇ vēvaiyoṭu
{malai-169} kurūu kaṇ iṟaṭi pommal peṟukuvir
{malai-170} ēṟi tarūum ilaṅku malai tāramoṭu
{malai-171} vēy peyal viḷaiyuḷ tēm kaḷ tēṟal
{malai-172} kuṟaivu iṉṟu paruki naṟavu makiḻntu vaikaṟai
{malai-173} paḻam cerukku uṟṟa num aṉantal tīra
{malai-174} aruvi tanta paḻam citai veḷ kāḻ
{malai-175} varu vicai tavirtta kaṭamāṉ koḻum kuṟai
{malai-176} muḷavumā tolaicciya paim niṇapiḷavai
{malai-177} piṇavu nāy muṭukkiya taṭiyoṭu viraii
{malai-178} veḷ puṭai koṇṭa tuy talai paḻaṉiṉ
{malai-179} iṉ puḷi kalantu mā mōr āka
{malai-180} kaḻai vaḷar nelliṉ ari ulai ūḻttu
{malai-181} vaḻai amai cāral kamaḻa tuḻaii
{malai-182} naṟu malar aṇinta nāṟu iru mucci
{malai-183} kuṟamakaḷ ākkiya vāl aviḻ valci
{malai-184} akam mali uvakai ārvamoṭu aḷaii
{malai-185} makam muṟai taṭuppa maṉai toṟum peṟukuvir
{malai-186} ceru cey muṉpiṉ kurucil muṉṉiya
{malai-187} paricil maṟappa nīṭal um uriyir
{malai-188} aṉaiyatu aṉṟu avaṉ malai micai nāṭu ē
{malai-189} nirai itaḻ kuvaḷai kaṭi vī toṭiṉum
{malai-190} varai aramakaḷir irukkai kāṇiṉum
{malai-191} uyir cela vempi paṉittal um uriyir
{malai-192} pala nāḷ nillātu nila nāṭu paṭarmiṉ
{malai-193} viḷai puṉam niḻattaliṉ kēḻal añci
{malai-194} puḻai toṟum māṭṭiya irum kal aṭāar
{malai-195} arum poṟi uṭaiya āṟu ē naḷ iruḷ
{malai-196} alari virinta viṭiyal vaikiṉir kaḻimiṉ
{malai-197} naḷintu palar vaḻaṅkā ceppam tuṇiyiṉ
{malai-198} murampu kaṇ uṭainta paral aval pōḻvil
{malai-199} karantu pāmpu oṭuṅkum payampumār uḷa ē
{malai-200} kuṟi koṇṭu maram koṭṭi nōkki
{malai-201} ceṟi toṭi viṟaliyar kaitoḻūu paḻicca
{malai-202} vaṟitu neṟi orīi valam ceyā kaḻimiṉ
{malai-203} pulantu puṉiṟu pōkiya puṉam cūḻ kuṟavar
{malai-204} uyarnilai itaṇam ēṟi kai puṭaiyūu
{malai-205} akal malai iṟumpil tuvaṉṟiya yāṉai
{malai-206} pakal nilai taḷarkkum kavaṇ umiḻ kaṭum kal
{malai-207} iru vetir īrm kaḻai tatti kalleṉa
{malai-208} karu viral ūkam pārppōṭu iriya
{malai-209} uyir ceku marapiṉ kūṟṟattu aṉṉa
{malai-210} varum vicai tavirātu maram maṟaiyā kaḻimiṉ
{malai-211} uravu kaḷiṟu karakkum iṭaṅkar oṭuṅki
{malai-212} iraviṉ aṉṉa iruḷ tūṅku varaippiṉ
{malai-213} kumiḻi cuḻalum kuṇṭu kayam muṭukkar
{malai-214} akaḻ iḻintaṉṉa kāṉ yāṟṟu naṭavai
{malai-215} vaḻūum maruṅku uṭaiya vaḻāal ōmpi
{malai-216} parūu koṭi valanta matalai paṟṟi
{malai-217} turuviṉ aṉṉa puṉ talai makārōṭu
{malai-218} oruvir oruvir ōmpiṉir kaḻimiṉ
{malai-219} aḻuntu paṭṭu alamarum puḻaku amal cāral
{malai-220} viḻuntōr māykkum kuṇṭu kayattu arukā
{malai-221} vaḻumpu kaṇ putaitta nuṇ nīr pāci
{malai-222} aṭi nilai taḷarkkum aruppam um uṭaiya
{malai-223} muḻu neṟi piṇaṅkiya nuṇ kōl vēraloṭu
{malai-224} eruvai mel kōl koṇṭaṉir kaḻimiṉ
{malai-225} uyarnilai mā kal pukar mukam putaiya
{malai-226} māriyiṉ ikutaru vil umiḻ kaṭum kaṇai
{malai-227} tāroṭu polinta viṉai navil yāṉai
{malai-228} cūḻiyiṉ polinta cuṭar pū ilañci
{malai-229} ōr yāṟṟu iyaviṉ mūtta puricai
{malai-230} parāvu aru marapiṉ kaṭavuḷ kāṇiṉ
{malai-231} toḻā nir kaḻiyiṉ allatu vaṟitu
{malai-232} num iyam toṭutal ōmpumiṉ mayaṅku tuḷi
{malai-233} māri talaiyum avaṉ mallal veṟpu ē
{malai-234} alakai aṉṉa veḷ vēr pīli
{malai-235} kalava maññai kaṭciyil taḷariṉum
{malai-236} kaṭum paṟai kōṭiyar makāar aṉṉa
{malai-237} neṭum kaḻai kompar kaṭuvaṉ ukaḷiṉum
{malai-238} nēr koḷ neṭu varai nēmiyiṉ toṭutta
{malai-239} cūr pukal aṭukkattu piracam kāṇiṉum
{malai-240} ñerēreṉa nōkkal ōmpumiṉ urittaṉṟu
{malai-241} nirai celal mel aṭi neṟi māṟu paṭukuvir
{malai-242} varai cēr vakuntiṉ kāṉattu paṭiṉ ē
{malai-243} kaḻutil cēṇōṉ ēvōṭu pōki
{malai-244} iḻutiṉ aṉṉa vāl niṇam cerukki
{malai-245} niṟam puṇ kūrnta nilam tiṉ maruppiṉ
{malai-246} neṟi keṭa kiṭanta irum piṇar eruttiṉ
{malai-247} iruḷ tuṇintaṉṉa ēṉam kāṇiṉ
{malai-248} muḷi kaḻai iḻainta kāṭu paṭu tīyiṉ
{malai-249} naḷi pukai kamaḻātu iṟāyiṉir micaintu
{malai-250} tukaḷ aṟa tuṇinta maṇi maruḷ teḷ nīr
{malai-251} kuvaḷai am paim cuṉai acaivu viṭa paruki
{malai-252} mikuttu patam koṇṭa parūu kaṇ potiyiṉir
{malai-253} puḷ kai pōkiya puṉ talai makārōṭu
{malai-254} aṟku iṭai kaḻital ōmpi āṟṟa num
{malai-255} il pukkaṉṉa kal aḷai vatimiṉ
{malai-256} al cērntu alki acaital ōmpi
{malai-257} vāṉ kaṇ virinta viṭiyal ēṟṟu eḻuntu
{malai-258} kāṉaka paṭṭa ce neṟi koṇmiṉ
{malai-259} kayam kaṇṭaṉṉa akal pai am kaṇ
{malai-260} maintu mali ciṉatta kaḷiṟu mataṉ aḻikkum
{malai-261} tuñcu maram kaṭukkum mācuṇam vilaṅki
{malai-262} ikantu cēṇ kamaḻum pū um uṇṭōr
{malai-263} maṟantu amaikallā paḻaṉ um ūḻ iṟantu
{malai-264} perum payam kaḻiyiṉum māntar tuṉṉār
{malai-265} irum kāl vīyum peru maram kuḻām um
{malai-266} iṭaṉ um valaṉ um niṉaiyiṉar nōkki
{malai-267} kuṟi aṟintu avai avai kuṟukātu kaḻimiṉ
{malai-268} kōṭu pala murañciya kōḷi ālattu
{malai-269} kūṭu iyattu aṉṉa kural puṇar puḷḷiṉ
{malai-270} nāṭu kāṇ naṉam talai meṉmela akaṉmiṉ
{malai-271} mā niḻal paṭṭa maram payil iṟumpiṉ
{malai-272} ñāyiṟu teṟāa mākam naṉam talai
{malai-273} tēem maruḷum amaiyam āyiṉum
{malai-274} iṟāa vaṉ cilaiyar mā tērpu koṭkum
{malai-275} kuṟavar um maruḷum kuṉṟattu paṭiṉ ē
{malai-276} akal kaṇ pāṟai tuvaṉṟi kalleṉa
{malai-277} iyaṅkal ōmpi num iyaṅkaḷ toṭumiṉ
{malai-278} pāṭu iṉ aruvi payam keḻu mīmicai
{malai-279} kāṭu kāttu uṟaiyum kāṉavar uḷar ē
{malai-280} nilai tuṟai vaḻīiya mataṉ aḻi mākkaḷ
{malai-281} puṉal paṭu pūcaliṉ viraintu val eyti
{malai-282} uṇṭaṟku iṉiya paḻaṉ um kaṇṭōr
{malai-283} malaitaṟku iṉiya pū um kāṭṭi
{malai-284} ūṟu nirampiya āṟu avar muntuṟa
{malai-285} nummiṉ neñcattu avalam vīṭa
{malai-286} immeṉ kaṭumpōṭu iṉiyir ākuvir
{malai-287} aṟiñar kūṟiya mātiram kaikkoḷpu
{malai-288} kuṟiya um neṭiya um ūḻ iḻipu putuvōr
{malai-289} nōkkiṉum paṉikkum nōy kūr aṭukkattu
{malai-290} alar tāya vari niḻal acaiyiṉir iruppiṉ
{malai-291} pala tiṟam peyarpavai kēṭkuvir mātō
{malai-292} kalai toṭu perum paḻam puṇ kūrntu ūṟaliṉ
{malai-293} malai muḻutu um kamaḻum mātiram tōṟum
{malai-294} aruvi nukarum vāṉ aramakaḷir
{malai-295} varu vicai tavirātu vāṅkupu kuṭaitoṟum
{malai-296} teri imiḻ koṇṭa num iyam pōl iṉ icai
{malai-297} ilaṅku ēntu maruppiṉ iṉam piri oruttal
{malai-298} vilaṅkal mīmicai paṇavai kāṉavar
{malai-299} pulam pukku uṇṇum puri vaḷai pūcal
{malai-300} cēy aḷai paḷḷi eḵku uṟu muḷḷiṉ
{malai-301} ey teṟa iḻukkiya kāṉavar aḻukai
{malai-302} koṭuvari pāynteṉa koḻunar mārpil
{malai-303} neṭu vaci viḻuppuṇ taṇimār kāppu eṉa
{malai-304} aṟal vāḻ kūntal koṭicciyar pāṭal
{malai-305} talai nāḷ pūtta poṉ iṇar vēṅkai
{malai-306} malaimār iṭūum ēmam pūcal
{malai-307} kaṉṟu araippaṭṭa kayam talai maṭam piṭi
{malai-308} valikku varampu ākiya kaṇavaṉ ōmpaliṉ
{malai-309} oḷ kēḻ vaya puli pāynteṉa kiḷaiyoṭu
{malai-310} neṭu varai iyampum iṭi umiḻ taḻaṅku kural
{malai-311} kai kōḷ maṟanta karu viral manti
{malai-312} aru viṭar vīḻnta taṉ kallā pārppiṟku
{malai-313} muṟi mēy yākkai kiḷaiyoṭu tuvaṉṟi
{malai-314} ciṟumai uṟṟa kaḷaiyā pūcal
{malai-315} kalai kaiyaṟṟa kāṇpu iṉ neṭu varai
{malai-316} nilai peytu iṭṭa mālpu neṟi āka
{malai-317} perum payaṉ tokutta tēm koḷ koḷḷai
{malai-318} arum kuṟumpu eṟinta kāṉavar uvakai
{malai-319} tiruntu vēl aṇṇaṟku viruntu iṟai cāṉm eṉa
{malai-320} naṟavu nāḷ ceyta kuṟavar tam peṇṭiroṭu
{malai-321} māṉ tōl ciṟu paṟai kaṟaṅka kalleṉa
{malai-322} vāṉ tōy mīmicai ayarum kuravai
{malai-323} nal eḻil neṭum tēr iyavu vantaṉṉa
{malai-324} kal yāṟu olikkum viṭar muḻaṅku iraṅku icai
{malai-325} neṭum cuḻippaṭṭa kaṭuṅkaṇ vēḻattu
{malai-326} uravu ciṉam taṇittu peru veḷil piṇimār
{malai-327} viravu moḻi payiṟṟum pākar ōtai
{malai-328} oli kaḻai taṭṭai puṭaiyunar puṉam toṟum
{malai-329} kiḷi kaṭi makaḷir viḷi paṭu pūcal
{malai-330} iṉattiṉ tīrnta tuḷaṅku imil nal ēṟu
{malai-331} malai talaivanta maraiyāṉ kataḻ viṭai
{malai-332} māṟā maintiṉ ūṟupaṭa tākki
{malai-333} kōvalar kuṟavarōṭu oruṅku iyaintu ārppa
{malai-334} vaḷ itaḻ kuḷavi um kuṟiñci um kuḻaiya
{malai-335} nal ēṟu porūum kalleṉ kampalai
{malai-336} kāntaḷ tuṭuppiṉ kamaḻ maṭal ōcci
{malai-337} vaṇ kōḷ palaviṉ cuḷai viḷai tīm paḻam
{malai-338} uṇṭu paṭu miccil kāḻ payaṉ koṇmār
{malai-339} kaṉṟu kaṭāavuṟukkum makāar ōtai
{malai-340} maḻai kaṇṭaṉṉa ālai toṟum ñerēreṉa
{malai-341} kaḻai kaṇ uṭaikkum karumpiṉ ēttam um
{malai-342} tiṉai kuṟu makaḷir icai paṭu vaḷḷai um
{malai-343} cēmpu um mañcaḷ um ōmpiṉar kāppōr
{malai-344} paṉṟi paṟai um kuṉṟu akam cilampu um
{malai-345} eṉṟu i aṉaittu um iyaintu oruṅku īṇṭi
{malai-346} avala um micaiya um tuvaṉṟi pala uṭaṉ
{malai-347} alakai tavirtta eṇ arum tiṟatta
{malai-348} malai paṭu kaṭām mātirattu iyampa
{malai-349} kurūu kaṇ piṇaiyal kōtai makaḷir
{malai-350} muḻavu tuyil aṟiyā viyaluḷ āṅkaṇ
{malai-351} viḻaviṉ aṟṟu avaṉ viyaṉ kaṇ veṟpu ē
{malai-352} kaṇ taṇṇeṉa kaṇṭu um kēṭṭu um
{malai-353} uṇṭaṟku iṉiya pala pārāṭṭi um
{malai-354} iṉṉum varuvatu āka namakku eṉa
{malai-355} tol muṟai marapiṉir āki pal māṇ
{malai-356} ceru mikku pukalum tiru ār mārpaṉ
{malai-357} urum uraṟu karuviya peru malai piṟpaṭa
{malai-358} iṟumpūtu kañaliya iṉ kural viṟaliyar
{malai-359} naṟum kār aṭukkattu kuṟiñci pāṭi
{malai-360} kaitoḻūu paravi paḻicciṉir kaḻimiṉ
{malai-361} mai paṭu mā malai paṉuvaliṉ poṅki
{malai-362} kai tōyvu aṉṉa kār maḻai toḻuti
{malai-363} tūuyaṉṉa tuvalai tuvaṟṟaliṉ
{malai-364} tēem tēṟā kaṭum pari kaṭumpoṭu
{malai-365} kāay koṇṭa num iyam toypaṭāmal
{malai-366} kūval aṉṉa viṭar akam pukumiṉ
{malai-367} irum kal iruppattu iṟu varai cērātu
{malai-368} kuṉṟu iṭampaṭṭa ār iṭar aḻuvattu
{malai-369} niṉṟu nōkkiṉum kaṇ vāḷ vauvum
{malai-370} maṇ kaṉai muḻaviṉ talaikkōl koṇṭu
{malai-371} taṇṭu kāl āka taḷartal ōmpi
{malai-372} ūṉṟiṉir kaḻimiṉ ūṟu tava pala ē
{malai-373} ayil kāyntaṉṉa kūrm kal pāṟai
{malai-374} veyil puṟantarūum iṉṉal iyakkattu
{malai-375} katir ciṉam taṇinta amayattu kaḻimiṉ
{malai-376} urai cela veṟutta avaṉ nīṅkā cuṟṟamoṭu
{malai-377} purai tava uyariya maḻai maruḷ pal tōl
{malai-378} aracu nilai taḷarkkum aruppam um uṭaiya
{malai-379} piṉṉi aṉṉa piṇaṅku aril nuḻaitoṟum
{malai-380} muṉṉōṉ vāṅkiya kaṭu vicai kaṇai kōl
{malai-381} iṉ icai nal yāḻ pattar um vici piṇi
{malai-382} maṇ ār muḻaviṉ kaṇ um ōmpi
{malai-383} kai piṇi viṭāatu paipaya kaḻimiṉ
{malai-384} kaḷiṟu malaintaṉṉa kaṇ kūṭu tuṟukal
{malai-385} taḷi poḻi kāṉam talai tava pala ē
{malai-386} oṉṉā tevvar ulaivu iṭattu ārtteṉa
{malai-387} nal vaḻi koṭutta nāṇ uṭai maṟavar
{malai-388} cellā nal icai peyaroṭu naṭṭa
{malai-389} kal ēcu kavalai eṇṇu mika pala ē
{malai-390} iṉpuṟu muraṟkai num pāṭṭu viruppu āka
{malai-391} toṉṟu oḻuku marapiṉ num maruppu ikuttu tuṉaimiṉ
{malai-392} paṇṭu naṟku aṟiyā pulam peyar putuvir
{malai-393} cantu nīvi pul muṭintu iṭumiṉ
{malai-394} cellum tēettu peyar maruṅku aṟimār
{malai-395} kal eṟintu eḻutiya nal arai marāatta
{malai-396} kaṭavuḷ ōṅkiya kāṭu ēcu kavalai
{malai-397} oṭṭātu akaṉṟa oṉṉā tevvar
{malai-398} cuṭṭiṉum paṉikkum curam tava pala ē
{malai-399} tēm pāy kaṇṇi tēr vīcu kavikai
{malai-400} ōmpā vaḷḷal paṭarntikum eṉiṉ ē
{malai-401} mēmpaṭa veṟutta avaṉ tol tiṇai mūtūr
{malai-402} āṅkaṉam aṟṟu ē nammaṉōrkku ē
{malai-403} acaivuḻi acaii añcātu kaḻimiṉ
{malai-404} puli uṟa veṟutta taṉ vīḻ piṇai uḷḷi
{malai-405} kalai niṉṟu viḷikkum kāṉam ūḻ iṟantu
{malai-406} cilai oli verīiya ce kaṇ marai viṭai
{malai-407} talai iṟumpu kataḻum nāṟu koṭi puṟaviṉ
{malai-408} vēṟu pulam paṭarnta ēṟu uṭai iṉatta
{malai-409} vaḷai āṉ tīm pāl miḷai cūḻ kōvalar
{malai-410} vaḷaiyōr uvappa taruvaṉar coritaliṉ
{malai-411} palam peṟu nacaiyoṭu pati vayiṉ tīrnta num
{malai-412} pulampu cēṇ akala putuvir ākuvir
{malai-413} pakar viravu nelliṉ pala ari aṉṉa
{malai-414} takar viravu turuvai veḷḷaiyoṭu viraii
{malai-415} kalleṉ kaṭattu iṭai kaṭaliṉ iraikkum
{malai-416} pal yāṭṭu iṉam nirai elliṉir pukiṉ ē
{malai-417} pāl um mitavai um paṇṇātu peṟukuvir
{malai-418} tuym mayir aṭakkiya cēkkai aṉṉa
{malai-419} mey urittu iyaṟṟiya miti ataḷ paḷḷi
{malai-420} tī tuṇai āka cēntaṉir kaḻimiṉ
{malai-421} kūppiṭu kaṭakkum kūr nal ampiṉ
{malai-422} koṭu vil kūḷiyar kūvai kāṇiṉ
{malai-423} paṭiyōr tēytta paṇivu il āṇmai
{malai-424} koṭiyōḷ kaṇavaṉ paṭarntikum eṉiṉ ē
{malai-425} taṭi um kiḻaṅku um taṇṭiṉar tarīi
{malai-426} ōmpunar allatu uṭaṟṟunar illai
{malai-427} āṅku viyam koṇmiṉ atu ataṉ paṇpu ē
{malai-428} tēm paṭa malarnta marāa mel iṇar um
{malai-429} umpal akaitta oḷ muṟi yā um
{malai-430} taḷiroṭu miṭainta kāmaru kaṇṇi
{malai-431} tiraṅku maral nāril poliya cūṭi
{malai-432} murampu kaṇ uṭainta naṭavai taṇṇeṉa
{malai-433} uṇṭaṉir āṭi koṇṭaṉir kaḻimiṉ
{malai-434} ce vī vēṅkai pūviṉ aṉṉa
{malai-435} vēy koḷ arici mitavai corinta
{malai-436} cuval viḷai nelliṉ avarai am puḷim kūḻ
{malai-437} aṟku iṭai uḻanta num varuttam vīṭa
{malai-438} akaluḷ āṅkaṇ kaḻi miṭaintu iyaṟṟiya
{malai-439} pul vēy kurampai kuṭi toṟum peṟukuvir
{malai-440} poṉ aṟaintaṉṉa nuṇ nēr arici
{malai-441} veḷ eṟintu iyaṟṟiya mā kaṇ amalai
{malai-442} taṇṇeṉ nuṇ iḻutu uḷḷīṭu āka
{malai-443} acaiyiṉir cēppiṉ alkal um peṟukuvir
{malai-444} vicaiyam koḻitta pūḻi aṉṉa
{malai-445} uṇṇunar taṭutta nuṇ iṭi nuvaṇai
{malai-446} noym maram viṟakiṉ ñekiḻi māṭṭi
{malai-447} paṉi cēṇ nīṅka iṉitu uṭaṉ tuñci
{malai-448} pulari viṭiyal puḷ ōrttu kaḻimiṉ
{malai-449} pul arai kāñci puṉal poru putaviṉ
{malai-450} mel aval irunta ūr toṟum nal yāḻ
{malai-451} paṇṇu peyarttaṉṉa kā um paḷḷi um
{malai-452} pal nāḷ niṟpiṉum cēntaṉir celiṉum
{malai-453} nal pala uṭaittu avaṉ taṇ paṇai nāṭu ē
{malai-454} kaṇpu mali paḻaṉam kamaḻa tuḻaii
{malai-455} valaiyōr tanta irum cuval vāḷai
{malai-456} nilaiyōr iṭṭa neṭu nāṇ tūṇṭil
{malai-457} piṭi kai aṉṉa ce kaṇ varāal
{malai-458} tuṭi kaṇ aṉṉa kuṟaiyoṭu viraii
{malai-459} pakaṉṟai kaṇṇi paḻaiyar makaḷir
{malai-460} ñeṇṭu āṭu ceṟuvil tarāy kaṇ vaitta
{malai-461} vilaṅkal aṉṉa pōr mutal tolaii
{malai-462} vaḷam cey viṉaiñar valci nalka
{malai-463} tuḷaṅku tacumpu vākkiya pacum poti tēṟal
{malai-464} iḷam katir ñāyiṟṟu kaḷaṅkaḷ toṟum peṟukuvir
{malai-465} muḷ arittu iyaṟṟiya veḷ ari veḷ cōṟu
{malai-466} vaṇṭu paṭa kamaḻum tēm pāy kaṇṇi
{malai-467} tiṇ tēr naṉṉaṟku um ayiṉi cāṉm eṉa
{malai-468} kaṇṭōr maruḷa kaṭumpu uṭaṉ arunti
{malai-469} erutu eṟi kaḷamar ōtaiyoṭu nal yāḻ
{malai-470} marutam paṇṇi acaiyiṉir kaḻimiṉ
{malai-471} veṇṇel arinar taṇṇumai verīi
{malai-472} ce kaṇ erumai iṉam piri oruttal
{malai-473} kaṉai celal muṉpoṭu kataḻntu varal pōṟṟi
{malai-474} vaṉai kalam tikiriyiṉ kumiḻi cuḻalum
{malai-475} tuṉai celal talaivāy ō iṟantu varikkum
{malai-476} kāṇunar vayāam kaṭkiṉ cēyāṟṟiṉ
{malai-477} yāṇar oru karai koṇṭaṉir kaḻimiṉ
{malai-478} nitiyam tuñcum nivantu ōṅku varaippiṉ
{malai-479} pati eḻal aṟiyā paḻam kuṭi keḻīi
{malai-480} viyal iṭam peṟāa viḻu peru niyamattu
{malai-481} yāṟu eṉa kiṭanta teruviṉ cāṟu eṉa
{malai-482} ikaḻunar verūum kavalai maṟukiṉ
{malai-483} kaṭal eṉa kār eṉa olikkum cummaiyoṭu
{malai-484} malai eṉa maḻai eṉa māṭam ōṅki
{malai-485} tuṉi tīr kātaliṉ iṉitu amarntu uṟaiyum
{malai-486} paṉi vār kāviṉ pal vaṇṭu imirum
{malai-487} naṉi cēyttaṉṟu avaṉ paḻa viṟal mūtūr
{malai-488} poruntā tevvar irum talai tumiya
{malai-489} paruntu paṭa kaṭakkum oḷ vāḷ maṟavar
{malai-490} karum kaṭai eḵkam cāttiya putaviṉ
{malai-491} arum kaṭi vāyil ayirātu pukumiṉ
{malai-492} maṉṟil vatiyunar cēṇ pula paricilar
{malai-493} vel pōr cēey peru viṟal uḷḷi
{malai-494} vantōr maṉṟa aḷiyar tām eṉa
{malai-495} kaṇṭōr ellām amarntu iṉitiṉ nōkki
{malai-496} viruntu iṟai avar avar etirkoḷa kuṟuki
{malai-497} pari pulampu alaitta num varuttam vīṭa
{malai-498} eri kāṉṟaṉṉa pūm ciṉai marāattu
{malai-499} toḻuti pōka valintu akappaṭṭa
{malai-500} maṭam naṭai āmāṉ kayamuṉi kuḻavi
{malai-501} ūmai eṇkiṉ kuṭāvaṭi kuruḷai
{malai-502} mīmicai koṇṭa kavar pari koṭum tāḷ
{malai-503} varai vāḻ varuṭai vaṉ talai mā takar
{malai-504} aravu kuṟumpu eṟinta ciṟu kaṇ tīrvai
{malai-505} aḷai ceṟi uḻuvai kōḷ uṟa veṟutta
{malai-506} maṭam kaṇ maraiyāṉ perum cevi kuḻavi
{malai-507} arakku virittaṉṉa ce nilam maruṅkiṉ
{malai-508} paral tavaḻ uṭumpiṉ koṭum tāḷ ēṟṟai
{malai-509} varai polintu iyalum maṭam kaṇ maññai
{malai-510} kāṉakkōḻi kavar kural cēval
{malai-511} kāṉam palavu muḻavu maruḷ perum paḻam
{malai-512} iṭi kalappu aṉṉa naṟu vaṭi māviṉ
{malai-513} vaṭi cēṟu viḷainta tīm paḻam tāram
{malai-514} tūval kalitta ivar naṉai vaḷar koṭi
{malai-515} kāay koṇṭa nukam maruḷ nūṟai
{malai-516} parūu paḷiṅku utirtta pala uṟu tiru maṇi
{malai-517} kurūu puli poruta puṇ kūr yāṉai
{malai-518} muttu uṭai maruppiṉ muḻu vali miku tiraḷ
{malai-519} vaḷai uṭaintaṉṉa vaḷ itaḻ kāntaḷ
{malai-520} nākam tilakam naṟum kāḻ āram
{malai-521} karum koṭi miḷakiṉ kāy tuṇar pacum kaṟi
{malai-522} tiruntu amai viḷainta tēm kaḷ tēṟal
{malai-523} kāṉ nilai erumai kaḻai pey tīm tayir
{malai-524} nīl niṟam ōri pāynteṉa neṭu varai
{malai-525} nēmiyiṉ cellum ney kaṇ iṟāal
{malai-526} uṭampuṇarpu taḻīiya āciṉi aṉaittu um
{malai-527} kuṭa malai piṟanta taṇ perum kāviri
{malai-528} kaṭal maṇṭu aḻuvattu kayam vāy kaṭuppa
{malai-529} nōṉā ceruviṉ neṭum kaṭai tuvaṉṟi
{malai-530} vāṉattu aṉṉa vaḷam mali yāṉai
{malai-531} tātu eru tatainta muṟṟam muṉṉi
{malai-532} maḻai etir paṭu kaṇ muḻavu kaṇ ikuppa
{malai-533} kaḻai vaḷar tūmpiṉ kaṇ iṭam imira
{malai-534} marutam paṇṇiya karum kōṭṭu cīṟu yāḻ
{malai-535} narampu mītu iṟavātu uṭaṉ puṇarntu oṉṟi
{malai-536} kaṭavatu aṟinta iṉ kural viṟaliyar
{malai-537} toṉṟu oḻuku marapiṉ tam iyalpu vaḻāatu
{malai-538} arum tiṟal kaṭavuḷ paḻicciya piṉṟai
{malai-539} viruntiṉ pāṇi kaḻippi nīḷ moḻi
{malai-540} kuṉṟā nal icai ceṉṟōr umpal
{malai-541} iṉṟu ivaṇ cellātu ulakamoṭu niṟpa
{malai-542} iṭai terintu uṇarum periyōr māynteṉa
{malai-543} koṭaikkaṭaṉ iṟutta cemmalōy eṉa
{malai-544} veṉṟi pal pukaḻ viṟalōṭu ētti
{malai-545} ceṉṟatu noṭiya um viṭāaṉ nacai tara
{malai-546} vantatu cālum varuttam um peritu eṉa
{malai-547} poru muraṇ etiriya vayavaroṭu polintu
{malai-548} tiru nakar muṟṟam aṇukal vēṇṭi
{malai-549} kalleṉ okkal nal valattu irīi
{malai-550} uyarnta kaṭṭil urumpu il cuṟṟattu
{malai-551} akaṉṟa tāyattu aḵkiya nuṭpattu
{malai-552} ilam eṉa malarnta kaiyar āki
{malai-553} tam peyar tammoṭu koṇṭaṉar māyntōr
{malai-554} neṭu varai iḻitaru nīttam cāl aruvi
{malai-555} kaṭu varal kaluḻi kaṭku iṉ cēyāṟṟu
{malai-556} vaṭu vāḻ ekkar maṇaliṉum palar ē
{malai-557} ataṉāl pukaḻoṭu um kaḻika nam varainta nāḷ eṉa
{malai-558} parantu iṭam koṭukkum vicumpu tōy uḷḷamoṭu
{malai-559} nayantaṉir ceṉṟa nummiṉum tāṉ peritu
{malai-560} uvanta uḷḷamōṭu amarntu iṉitu nōkki
{malai-561} iḻai maruṅku aṟiyā nuḻai nūl kaliṅkam
{malai-562} eḷ aṟu ciṟappiṉ veḷ arai koḷīi
{malai-563} muṭuval tanta paim niṇam taṭiyoṭu
{malai-564} neṭu veṇṇeliṉ arici muṭṭātu
{malai-565} talai nāḷ aṉṉa pukaloṭu vaḻi ciṟantu
{malai-566} pala nāḷ niṟpiṉum peṟukuvir nillātu
{malai-567} celvēm tilla em tol pati peyarntu eṉa
{malai-568} melleṉa kūṟi viṭuppiṉ num uḷ
{malai-569} talaivaṉ tāmarai malaiya viṟaliyar
{malai-570} cīr keḻu ciṟappiṉ viḷaṅku iḻai aṇiya
{malai-571} nīr iyakku aṉṉa nirai celal neṭum tēr
{malai-572} vāri koḷḷā varai maruḷ vēḻam
{malai-573} kaṟaṅku maṇi tuvaikkum ēṟu uṭai peru nirai
{malai-574} polam paṭai polinta koy cuval puravi
{malai-575} nilam tiṉa kiṭanta nitiyamōṭu aṉaittu um
{malai-576} ilampaṭu pulavar ēṟṟa kaim niṟaiya
{malai-577} kalam peya kaviḻnta kaḻal toṭi taṭam kaiyiṉ
{malai-578} vaḷam piḻaippu aṟiyātu vāy vaḷam paḻuni
{malai-579} kaḻai vaḷar navirattu mīmicai ñerēreṉa
{malai-580} maḻai curantaṉṉa īkai nalki
{malai-581} talai nāḷ viṭukkum paricil malai nīr
{malai-582} veṉṟu eḻu koṭiyiṉ tōṉṟum
{malai-583} kuṉṟu cūḻ irukkai nāṭu kiḻavōṉ ē